مصعد للعوائل ؟!

في سابقة جديدة أو حدث جديد لم يتطرق له أحد ....من الممكن تكون حادثة شخصية أو فردية.....لكن ....!

في مستشفى المملكة في الطابق الثاني ..... (آسف أبكتب بالعامية)

في الدور الثاني أبي أنزل...المصعد الموجود بطيء بشكل ما تتصورونه، يرفع مرارة رجلك بسبب الوقوف! وكنت مستعجل جداً..

انتظر..

انتظر...

محد حولك ؟

يمين يسار يا هوه افتح ..ما فيه إلا أنا لحالي واقف

قلت يا ولد خلني أنزل الدرج أسرع..ورياضة في نفس الوقت

بغيت أنزل ما لقيت سلم الطوارئ..

الحماقة وين؟ فيه لافته بين المصعدين وبارزة وواضحة ( في حالة حريق أرجو استعمال السلالم بدلاً من المصعد) شي زي كذا.

السلالم على قولتهم ما لقيته مدري وين مخبينه..؟

يمكن في حالة الحريق يطلع ؟ ما أدري كل شي جايز !!!

المهم صبرت على البلوى لما فتح آخيراً رحت أركض قبل لا يسكر ..إلا واحد هداه الله هو ويا حرمته المحتشمه وولدهم الصغير يناظر نفسه في المراية، قام يناظرني الرجال كأنه يقول انتظر إلي بعدي، ويسكر الباب علي..

كمااان مان ؟ (بالأنجليزي) وين عايشين ..

سبحان الله ...فتح المصعد الثاني تعويض عن العائلة الأولى (يوصلون بالسلامه إن شاء الله) ، إلا يزود القهر قهر ... والغبطة غبطة، والمرارة جلطة .... ثلاث حريم معهم قهوة شكلهم طالعين من زيارة شخص أو شخصه ههه ( الله يشفيه ويقومه بالعافية أو أي دعوه خير ثانية) ..بغيت أتهور وأركب معهم بس قلت يا ولد أصبر ..الصبر جميل ..

بعد ما نزّلهم وعلى ما بال رقى وياخذني وينزلني  تأخرت 10 دقايق ..

ممكن تقول ....بسسس؟!؟! شويه

أوكي 10 دقايق على إيش الله يسلمك ؟ 

ما فيه زحمة ولا فيه أي شي يسبب التأخير هذا ..

الحين بتقرون وأنتم مستغربين من وجهت نظري ( الدين والاسلام والمرأة ووو) ..في الحقيقة هذا مصعد للجميع وليس للعوائل ولا الشباب.

يعني فرضاً أنا في سوق ( يعني 90 % حريم) وأبغى أنزل أو أصعد هل تتوقعون انتظر لما الحريم يقولن أركب لحالك ؟؟؟

مستحيل...وخاصة إن الحرمة إذا شافتك لحالك حتى في طابور على كاشير صقطت قدامك ...وييييين ؟

نعيش في ظلم المرأة وهم يعيشون في ظلمنا ..

النتيجة تعادل.

شكراً.